Poslovne vijesti - Makedonija

„Кромберг и Шуберт“ ја доби дозволата за фабрика во Жабени

Германската фирма „Кромберг и Шуберт“ го доби одобрението за изградба на фабрика за автомобилски кабли во индустриската зона „Жабени“ во Битола.

Ова е прво одобрение за градење фабрика кое го издала Општината по најавите за 13 нови инвеститиции во зоната.

„Кромберг и Шуберт“ најавува инвестиции од 20 милиони евра во Жабени и тоа во капацитет за изработка на кабелски инсталации за производители на автомобили од Европа. За почеток се најавени 2.500 работни места.

,,Оваа фабрика првично ќе се гради на површина од 25 илјади квадратни метри. Градежната дозвола ја добивме во најкраток рок и уште овој понеделник планираме да почнеме со работите на терен. Ќе се чисти и ќе се подготвува локацијата за градба. Рокот за изградба е многу краток, што значи до март наредната година магацинот и просторот за изработка на кабли ќе мора да се подигне. Административниот објект и просторот за работниците ќе се доградат до мај 2012 година“, рече Михаил Димитровски, претставник на „Иванов инженеринг“, фирма-консултант, претставник на германската фирма во Македонија.

Градоначалникот на Битола, Владимир Талески, вели дека неколку години се создаваат услови за инвестиции во „Жабени“, а сега зоната е инфраструктурно подготвена за новите фабрики.